KANYATAN AGUNG PAPAT

~SABDA BADRA-SANTI Bab XVII: KANYATAN AGUNG PAPAT

811. Kaanane wong urip sing priye wae
Nadyan kere nadyan sugih apa dene
Nadyan gedhe nadyan cilik pada wae
Sing wis tuwa lan enom semono uga
Wong lananga wong wadona uga padha
Saben dina nandhang Repot lan Rekasa

812. Mula bukane ana tuwuh pangrasa
Pra manungsa nandhang Krepotan Rekasa
Awit saka kablenggu anane Karsa
Mula nganti tuwuh pangrasane ati
Sagung janmi nandhang Repot rina wengi
Kang njalari: Pepenginan neka warni

813. Yen panjangka, Pepenginan, ora ana
Saben janma kwagang nyandhet drenging Karsa
Ing wasana panandhang Rekasa sirna
Bisa nyingkang Pepenginan nganti ilang
Ati padhang, sirna sakehing Panandhang
Ribet ilang pikir tentrem ora mamang

814. Sarat srana sirnane nandhang Rekasa
Pra manungsa Rekasa Repote sirna
Ora liya mung manut Sabda Sang Buddha
Sabda iku aran: “MARGA AGUNG WOLU”
Yen digugu nemu tentrem jroning kalbu
Gelem niru klakon Begja lan Rahayu.